Egin nahi diren lanen proposamenaren ondorioz, lau urrats edo faseak burutzen direnean, herriaren erdigunea hartuko duen ibilbide-sare bat sortzeko aukera emango du. Egitasmoan sartu diren kaleen artean Kale Nagusia, Aizkibel, Aingeru kalea, Julio Urkijo eta Izarraitz ditugu. Horrela, herriaren eguneroko funtzioamenduan oso garrantzitsuak diren eraikin askotarako irisgarritasuna bermatua geratuko da. Eraikin horien artean ditugu Udaletxea edota kultura eginkizunetara bideratutako hainbat eraikin (Kultur Etxea, Baztartxo Antzokia, Aizkibel Liburutegia eta Musika Eskola) edota hezkuntza eta kirol jardueretara bideratuak. Era berean, autobus geltokien erabilera ere bermatuko da. Azkoitian garrantzia duen arazo bat da San Martin eta Izarraitz auzoetara iristeko edota haietatik herriaren erdigunearekin lotura izateko dagoen zailtasuna. Egitasmoan alde horretatik inolako proposamenik aurreikusi ez bada ere, komeniko litzateke aztertzea baliabide mekanikoen aldetik (igogailua, eskilara mekanikoak...) eta, hain zuzen ere, hori da egin dena Floreaga eta San Martingo proiektuak aurkeztu direnean, Eusko Jaurlaritzak bultzatutako IZARTUZ programaren baitan.

Proposatu diren lanek, sarri askotan, inbertsio oso handia eskatzen dute eta irtenbide tekniko oso garrantzitsuak, hala nola gaur egun zabalera txikiegia duten espaloiak zabaltzea edota bide-zati bat plataforma edo norabide bakarreko bihurtzea. Lan hauek eragin handia dute herriaren bideetan egin beharreko lanetarako plangintzaren aurrekontuan, bai eta herri-gunearen beraren egituraketan ere, eta beraz, Egitasmoan aurreikusia dago haiei tratamendu zehatzagoa ematea.

Interbentzio-lanen artean, azpimarragarria da, besteak beste, Kale Nagusian Estrada eta Balda Plaza arteko bide-zatia norabide bakarreko bihurtzea, kalearen zabalerak ez baitu ematen trafikoa kendu gabe espaloiak zabaltzeko aukerarik. Kontuan izan beharrekoa da, era berean, egokitu beharreko oinezkoen pasabide kopurua, batik bat Kale Nagusian eat Julio Urkijo, Klara Donea eta Aingeru Kaleetan.

Taulan ikus daitekeenez, bada lan ildo bat besteen gainetik nabarmentzen dena, oinezkoentzako pasabideena, hain zuzen ere, Egitasmoko lanen aurrekontuaren %49a hartzen baitu eta eragin oso handia baitu herriaren bideetan egin beharreko lanen aurrekontuan.

Beste interbentzio-lan garrantzitsua da plataforma bakarra egitearena, %24arekin, herri-bideak egokitzeko aurrekontuetan esanahi berezi baitu.