Udalaren jabetzako edota honek kudeatzen dituen eraikinak aztertu dira, eta Udalak bere gain hartuko dituen egokitze-lanak ikusi. Irizpide hauek ezarriz, egitasmo honetan 15 eraikuntza aztertu dira. Hautaketa egiteko irizpideak hauek izan dira: 1. Udalaren jabetzako edota honek kudeatutako eraikinak. 2. Egokitzea bereziki merezi duten eraikinak. 3. Jende asko ibili ohi den eraikinak. 4. Pertsona helduei bideratutako eta haurren heziketarako eraikinak. 5. Irisgarriak ez diren eraikinak, aurretik arlo horretan interbentziorik egin gabeak. Eraikin bakoitzean, irisgarritasun irizpideak eraikinaren gela guztietan ezartzea da helburua. Hori egiteak dituen zailtasunak kontuan izanik, eraikinetan egin beharreko lanak aztertu eta proposatzerakoan hainbat egoera gerta daitezke.

1.- Gela edo dependentzia guztiak egokitzea teknikoki ezinezko baldin bada, egunero erabiltzen diren edota herritarrei irekitako zerbitzuren bat ematen den areto eta gelak egokitzea proposatzen da.

2.- Azken hau ezinezko balitz, herritarrei arreta emateko zerbitzuak dituzten areto eta gela hauek irisgarritasun baldintzak betetzen dituzten aretoetara edota egokitzeko aukera ematen dutenetara eramatea proposatzen da.

3.- Areto bat bera ere ezingo balitz egokitu, edota egokitutako komunik ezin baldin bada egin, eraikinean ematen den zerbitzua irisgarritasun baldintzak betetzen dituen beste eraikin batean jartzea proposatzen da.

4.- Eraikinera iristeko bideek ez badira irisgarritasun baldintzetan sartzen, eta gainera egokitzea ezinezko baldin bada, eraikinaren erabilera aldatu eta han dagoen zerbitzua irisgarritasuna bermatzen duen beste eraikin batean jartzea proposatzen da.

Azaldu berri diren kasu guztietan, irisgarritasun arloan gutxieneko parametroak lortzeko egin beharreko lanak teknikoki egin ezinak badira edota neurriz kanpokoak badira, praktikabilitate irizpideak hartuko dira balekotzat.